Månedens replikk - oktober 2004

Bodil Sund har valt seg verket ”Svart nr. 1” (1987) av Kari Stiansen. Her fortel ho om kvifor ho valde seg nettopp dette verket:
”Eg hugsar godt utstillinga i Haugesund Billedgalleri i 1987 kor eg for fyrste gong fekk sjå teppet til Kari Stiansen. Aldri har eg gløymt det vakre, svarte teppet der eit svakt anstrøk av blått opnar ei ”luftluke” i alt det mørke. Eg vart gripen av dette heilslege, beherska teppet utan litterær antyding. Det kviler tungt i kraft av seg sjølv, verdig, alvorleg, tungt, majestetisk, -eit meditasjonsobjekt vikla saman av trådar i ulik retning og struktur. Eg ser ”Månedens Replikk” som eit kjært høve til å få teppet ut av magasinet og fram i lyset.

Min replikk ville eg skulle nærme seg det tekstile materialet på ein aldeles motsett måte! Eg er oppteken av motsetningar, av å kunne sjå ei sak frå fleire sider eller kanskje opp-ned. Mot det tunge, mørke, alvorlege og mystiske bakteppet ynskte eg å replisera med noko lystig og lett, brokete og fargerikt, skulpturelt, humoristisk og frivolt. Der teppet er tilbaketrekt og høgtideleg abstrahert, ville eg varte opp med noko konkret, fornøyeleg freidig og skrekkeleg jålete. Den svarte fargen har eg teke opp att på mitt vis, sjå sjølv.”